昨日星期日, 我同女友去o左西貢白沙洲影相....
果度係一個小島, 位置在橋咀泳灘(橋咀島)對面, 坐街渡每人來回廿蚊....
島上面除o左墳墓同一個小碼頭之外, 就無其他"建築物"了....
島上最出名的, 就係連住另一個小島"小鏟洲"的沙灘, 但呢個沙灘要潮退先至出現....
至於景色,除o左呢度, 大家仲可以去我另一個 blog 睇睇:
http://owensuen.spaces.live.com/
不過, 去呢個島都有點"難度", 因為個小碼頭太矮, 所以即使街渡都唔可以咁容易"靠岸", 結果, 我地要o向一堆石灘登陸, 好似人地偷渡咁.....
登陸後, 我地要行上個小山坡, 先至可以到達另一邊沙灘同埋個小碼頭, 但沿途係無石屎路行, 我地要踏過前人行過的小路, 先至上到去山上面.... 而且, 這些路都係由前人為o左掃墓而踏出來的草地, 所以都幾驚會打攪到黃土下的他們.... 亦驚會有蛇蟲鼠蟻o向草叢裡面o架....
之後上到小山坡, 果度高度應該有五六層樓左右啦....
因為之前影相都好少係草地, 所以今次都會盡量o向果個山頭影多o的相....
(其他相在另一個blog)
落山果陣, 我的確有種"上山容易下山難"的感覺.... 因為上山的路容易睇到, 但下山就難得多啦.... 好在, 沿住o的墓地, 都會隱約見到o的路, 終於, 當見到個破爛的骨灰龕, 見到樹林, 算係到海邊了......
去到海邊沙灘, 俾我地見到沙灘上有兩張椅同一張枱, 當然要把握時間用來影下相啦.... 上次我地去鹽田仔果陣, 個艇家話呢個白沙洲好多新人去影相, 我估呢o的桌椅, 都係由影樓的人留低.... 所以, 一借無防.... 而且, 呢o的傢俬仲好鬼新淨....
我地响沙灘影相期間, 仲見到有一班人玩 war game.... 好在, 佢地無殃及池魚.... 而呢個沙灘, 雖然部份地方都幾多碎石, 但就比香港其他海灘不同, 因為這裡更富有自然感覺, 會見到更大的貝殼, 甚至海星同珊瑚, 都係其他海灘未見過的....
好在我地到達時間係退潮時間, 所以, 我地可以响連著兩個小島的沙灘上影相.... 其實這個沙灘特別之處, 在於沙灘兩邊都有浪打埋去, 感覺比較特別.....
其間, 我地見到海上面有人滑水, 而且仲有"登陸"呢個沙灘休息.... 而且, 亦有一對情侶玩獨木舟, 個女仔仲走埋來問我地响度做乜, 仲同我地影o左兩張相添..... 之後又有另一對情侶駕駛獨木舟登上, 同埋一個小家庭, 駕駛橡皮艇登陸, 結果, 呢個人跡罕至的沙灘, 變得熱鬧得多了.....
最後, 因為我地費事又要行上個小山坡, 响亂石堆上船, 所以就叫o左船家去小碼頭接我地....
後記: 昨晚我地離開西貢之後, 去o左銅鑼灣, 搵到間新開的壽司店, 叫"浪速壽司", 佢地o的野食唔錯, 尤其係烏冬, 同官塘 APM 果間成日大排長龍的"赤丸製麵所"的烏冬有得比....
